इंटरनेट, भारत आणि सरोगसी

इंटरनेटवर सहज सर्फिंग करताना 'सरोगसी' किंवा 'सरोगेट मदर इन इंडिया' असा शब्द टाईप केला असता काही सेकंदात सुमारे ६७ हजार ८०० वेबसाईची पाने आपल्या समोर येतात. त्यातील काही पाने काळजीपूर्वक वाचली असता असे दिसून येते की, भारत हा खरोखरच 'सरोगेट मदर'चा कारखानाच आहे. या वेबसाईटद्वारे पाश्चात्य दाम्पत्यांनी 'सरोगेट मदर' साठी भारतात यावे यासाठी त्यांना आकर्षित करणाऱ्या विविध सवलती, कायद्यात्मकदृष्ट्या काहीच अडचण नाही, अशा आशयाच्या जाहिराती केल्याचे दिसून येते.

उदाहरणादाखल www.delhi-ivf.com हे संकेतस्थळ पहिले असता यावर सरोगसी इन इंडिया या मजकुरासोबतच रेन्ट अ वोम्ब (गर्भाशय भाड्याने द्यायचे आहे) असे मथळे दिसतात. त्याचबरोबर भारतातच सरोगसी का करावी? भारतात सरोगसी केल्यास त्याचे फायदे काय? येथे सरोगासीचा खर्च फक्त १२ हजार अमेरिकन डॉलर (`५ लाख ४० हजार) तर तोच खर्च अमेरिका आणि इंग्लंडमध्ये ७० हजार अमेरिकन डॉलर (`३१ लाख ५० हजार) आहे. अमेरिका आणि इंग्लंडमध्ये सरोगसीसंदर्भात कायदे आहेत. तसे भारतात कायद्यात्मकदृष्ट्या काहीच बंधने नाहीत. अशा जाहिरातींद्वारे पाश्चात्य दाम्पत्यांना आकर्षित करण्याचा प्रयत्न केला जात आहे. 'सरोगेट मदर'च्या शोधात परदेशातून येणाऱ्या परदेशी लोकांसाठी भारतात २/३/५ स्टार हॉटेलांमध्ये बुकिंगची सोयही उपलब्ध करून दिले जात आहे. त्याचबरोबर त्यांच्यासाठी योग, तणावमुक्तीचे वेगवेगळे प्रकार आणि स्पा आदींची सोय उपलब्ध करून दिले जात आहे.

www.ivfcharotar.com (आकांक्षा इन्फर्टीलिटी क्लिनिक) या संकेतस्थळावर सरोगसीसंदर्भातील माहिती फ्रेंच, जर्मन, स्पानिश आणि जापनीज या भाषेतून दिली आहे. येथे सरोगेट मदरसाठी तुम्ही तुमची ट्रीप कशाप्रकारे अरेंज करू शकता याची इत्यंभूत माहिती येथे दिली आहे. तसेच लॉजिंग-बोर्डिंग, रिसोर्ट आणि स्पाची माहितीही दिली आहे.

www.findsurrogatemother.com या संकेतस्थळावर तुम्हाला कोणत्या देशात जाऊन सरोगासीची ट्रीटमेंट घ्यायची आहे किंवा सरोगेट मदर शोधायची आहे, याची माहिती दिली आहे. यात आर्मेनिया, जॉर्जिया, ग्रीस, भारत, युक्रेन आणि अमेरिका या देशातील सरोगसी सेंटर्स आणि क्लिनिक्सची माहिती दिली आहे. भारतातील दिल्ली, आनंद (गुजरात) आणि मुंबई या शहरातील सेंटरची माहिती दिली आहे.

www.ivfsurrogacycentre.com या संकेतस्थळावर तर बेधडकपणे असे म्हटले आहे की, सरोगसीच्या फक्त ट्रीटमेंटसाठी युके आणि अमेरिकेत जेवढा खर्च येतो तेवढ्या खर्चात भारतात तर तुमची संपूर्ण ट्रीटमेंट तर होतेच पण त्याचबरोबर तुमचे पर्यटन मनोरंजन होऊनही तुमचे बरेचसे पैसे वाचतील. आणि त्याहूनही महत्त्वाचे म्हणजे या सर्व प्रकीयेसाठी तुम्हाला भारतात बरेच दिवस राहण्याची गरज नाही. हे सर्व त्यांच्याच भाषेत सांगायचे तर - Treatment in USA /UK = Treatment in India + Tourising + Saving - Waiting Time. अशा जाहिरातीसोबत, भारतात सरोगसीसाठी जेमतेम २० ते ३० हजार डॉलर (`९ ते साडे तेरा लाख) खर्च येतो. पण पाश्चात्य देशात यासाठी सुमारे १ लाख २० हजार डॉलर (`५४ लाख) खर्च करावे लागतात. त्यामुळे ही ट्रीटमेंट आर्थिकदृष्ट्या भारतातच करणे कसे योग्य आहे हे सांगितले जात आहे. आर्थिक बाजूबरोबरच भारतात कायद्याच्याबाबतीतही काहीच अडचणी नाहीत, कारण अद्याप येथे तसा कायदाच नाही. सरोगेट मदर होण्यासाठी येथे मोठ्या संख्येने तरुणी उपलब्ध असल्याने आपल्याला निवड करण्याचीही सोय उपलब्ध आहे.
या अशा जाहिरातींमधील सर्वात धोकादायक बाब म्हणजे या क्लिनिकवाल्यांनी सरोगेट मदरचा धंदाच सुरु केला आहे. एका सरोगेट मदरची निवड केल्यास त्यासाठी १२ लाख रुपये द्यावे लागतील. परंतु, जर तुम्ही दोन सरोगेट मदरची निवड केल्यास तुम्हाला फक्त १६ लाख रुपये भरावे लागतील, अशाप्रकारच्याही जाहीराती या संकेतस्थळांवर दिसतात.

www.medicaltourismco.com या मेडिकल टुरिझम कंपनीने भारतात अत्यंत कमी खर्चात सरोगेट मदर किंवा सरोगसीची ट्रीटमेंट करून मिळते, अशी जाहीरात केली आहे. त्यासाठी त्यांनी २२ ते ३५ हजार युएस डॉलरचे (`१० ते पावणे पंधरा लाख) प्याकेजही जाहीर केले आहे. त्यात त्यांनी डॉक्टरची फी, वकिलाची फी, सरोगेट मदर शोधण्यासाठी लागणाऱ्या प्रकियेचा खर्च, नवजात बाळाच्या ट्रीटमेंटचा खर्च, सरोगेट मदरला द्यावा लागणारा मोबदला, स्त्री बिजांड/शुक्राणू देणाऱ्या संस्थेचा/घटकाचा मोबदला, औषधे आणि आयव्हीएफ तंत्रज्ञानावर खर्च असा सर्व गोष्टींचा समावेश केला आहे.